काँग्रेसले आजबाट तीन दोश्रोचरणको जागरण अभियान सुरु

नेपाली काँग्रेसले आजबाट तीन सय ३० वटै प्रदेश सभा क्षेत्रमा दोस्रो चरणको राष्ट्रिय जागरण अभियान सुरु गर्ने भएको छ । सामाजिक संवाद गर्ने गरी अभियान चलाइने काँग्रेस प्रवक्ता विश्वप्रकाश शर्माले जानकारी दिनुभयो । अभियानमा नेताहरूलाई ‘बोल्ने कम, सुन्ने बढी’ गर्न पार्टीले निर्देशन दिएको छ । अभियानको अन्तिम दिन ७ असोजमा केन्द्रीय तहबाट एउटा मात्र जिल्ला स्तरीय विरोधसभा राखिएको छ । त्यसबाहेक जागरण अभियानको चरणमा पार्टीका नेता एवं प्रतिनिधिले बोल्नेभन्दा सुन्ने विषयलाई विशेष प्राथमिकतामा राखिएको प्रवक्ता शर्माको भनाइ छ । स्थानीय आवश्यकतानुरूप सम्बन्धित तहले नै यस्तो कार्यक्रम गर्न सक्ने छन् । बीपी कोइरालाको १०६औँ जन्मजयन्तीको अवसर पारेर अभियान सुरु हुन लागेको हो । ३४ हजार नौ सय ८० वटा बिरुवा रोपेर अभियानको उद्घाटन गर्ने कार्यक्रम छ । कार्यक्रमका लागि पार्टीले सबै प्रदेश सभा क्षेत्रमा केन्द्रीय प्रतिनिधि पठाइएको जनाएको छ ।
यसैबीच प्रमुख प्रतिपक्षी दल नेपाली काँग्रेसले तीन वटा विधेयक तत्काल सच्याउन माग गरेको छ । प्रमुख सचेतक बालककृष्ण सरकारले सङ्घीय संसदमा प्रस्तुत गरी सम्बन्धित विषयगत समितिको छलफलमा रहेका ‘‘नेपाल नागरिकता ऐन, २०६३ लाई संशोधन गर्न बनेको विधेयक’’, ‘सङ्घीय निजामती सेवाको गठन, सञ्चालन र सेवाका शर्त सम्बन्धमा व्यवस्था गर्न बनेको विधेयक’’, र ‘‘सूचना प्रविधिको सम्बन्धमा व्यवस्था गर्न बनेको विधेयक’’ सच्याउन माग गरिएको सीआईएनसँग बताउनुभयो । काँग्रेस सांसदले संविधान प्रतिकूल भन्दै यी विधेयकहरु माथि संशोधन प्रस्ताव राख्नुका साथै समिति एवं उपसमितिहरुमा फरक मत राख्दै आएका छन् ।