रवि हमाल, मुगु बिहिबार, आषाढ ०७, २०८०
हिमाली जिल्ला मुगुमा गत वर्ष असोज १९ देखि २४ गतेसम्म परेको अविरल वर्षासँगै आएको बाढी पहिरोले घरबार, अन्न बाली सबै बगाएर लग्यो । ठूलो धनजन र मानवीय क्षति भोगेका मुगुका स्थानीय अहिले आकाशमा कालो बादल मडारिएको देखेपछि रातभर सुत्न सक्दैनन् ।
सरकारले अहिलेसम्म उनीहरुलाई पुर्नवासको व्यवस्थ गर्न सकेको छैन । उनीहरु अहिले कोही खुला चौरमा रात कटाइरहेका छन्, कोही आफन्तका घरमा छन् भने कोही त्यहिँ बाढीले क्षति पुर्याएको घरमा ज्यानको जोखिम मोलेर बस्दै आइरहेका छन् ।
गत वर्ष आएको बाढी पहिरोले मुगुमा ८ जनाको ज्यान लियो भने ५ जना गम्भीर घाइते हुन पुगे । बाढीपहिरोले २ सय ३६ घरमा पूर्ण क्षति पुर्याएको थियो भने १ सय ८८ घरमा आंशिक क्षति पुर्याएको थियो । यस्तै, २७ वटा गोठमा क्षति पुर्याएको थियो ।
अगुल्टो लागेको कुकुर बिजुली चम्किँदा तर्सिन्छ भन्ने उखानझैं हिजो आज आकासमा कालो बादल मडारिएको देख्नेवित्तिकै उनीहरुको निद्रा लाग्दैन । छाँयानाथ रारा नगर पालिका वडा नम्बर ६ का बाढीपीडित धन बहादुर बुढा भन्छन्, ‘हिजो आज पालमुनी बस्दै आएका छौँ । ठूलो परिवार छ, रातदिन काट्न निकै समस्या छ । बाढीले सबै बगाएर लगेको छ । पालमा बस्दा दिनमा घाम हुन्छ, राति चिसो । कहिले स्थानिय सरकारले घर निर्माणको पहल गरिदिने हो ।’
उनले सरकारले जनता छन् भन्ने नलागेको पनि गुनासो पोखे । यदि सरकारसँग आफ्नो जनता छ भन्ने सोच भइदिएको भए पुनःर्वासको व्यवस्था गरिसक्नुपर्ने बताए । अहिले उनी त्यहिँ बाढीले भत्काएको घरमा ज्यान जोखिममा राखेर बसेको बताउछन् ।
खत्याड गाँउपालिकाका उपाध्यक्ष सरिता रोकायाका अनुसार बाढी पहिरोले क्षति पुर्याएपछि पीडितहरुले लागत खर्चको विवरण संकलन गरेर दिइसकेका छन् । गाउँपालिकाले पीडितलाई केही राहत पनि दिइसकेको छ भने पीडितहरुको भौतिक क्षतिको विवरण प्रक्रियाअनुसार संकलन भइरहेको पनि उलने जानकारी दिइन् ।
उता, जिल्ला विपत व्यावस्थापन समितिका अध्यक्ष तथा प्रमुख जिल्ला अधिकारी मोहन थापाले पुर्नवास निर्माणको लागि के कति समय लाग्छ भन्ने विषयमा स्थानीय तहसँग पटक पटक जानकारी लिने काम भइरहेको बताए । उनले यकिन घर क्षतिको विवरण नआउन्जेलसम्म समितिबाट निर्णय गर्न नमिल्ने पनि बताए ।
उनका अनुसार यकिन विवरण प्राप्त नहुँदा बाढीपीडितहरुलाई पुर्नवासको लागि समस्या भएको छ । तर, उनले जतिसक्दो चाँडो पीडितलाई राहत दिइने बताए ।
यहाँ कमेन्ट गर्नुहोस्